राधावर पर सरवस हारी,

राधा पर राधावर वारी।

इक प्यारो प्रानन अनुहारी,

इक प्यारी प्रानहुँ ते प्यारी।

इक भये बंदीगृह निशि कारी,

इक भईं नृपघर भानु उजारी।

Source page 201

इक यशुमति घर अजिर बिहारी,

इक कीरति के महल मझारी।

इक अटपट नटवर तनुधारी,

इक सोरह शृंगार सँवारी।

इक सिर मोर मुकुट छवि प्यारी,

इक सिर चूनरि जरद किनारी।

इक सिर बिखरी लट घुँघुरारी,

इक सिर वेणी सुघर सँवारी।

इक नासा बेसर छविधारी,

इक नथ मोतियन लर छवि न्यारी।

इक कर लकुटि कामरि कारी,

इक कर वर हित नित रख प्यारी।

इक तनु नील पीत पटधारी,

इक तनु गौर, नील पट वारी।

इक चंचल गति मति रतिधारी,

इक भोरी अगनित गुन वारी।

इक अति निलज खात नित गारी,

इक अति सलज जलज दृग वारी।

Source page 202

इक सँग ग्वाल गमार अनारी,

इक सँग अगनित गुन गन वारी।

इक वन वन गोधन वनचारी,

इक अति ऊँचे महलन वारी।

इक हित हर भये नर ते नारी,

इक हित नारी भये बनवारी।

इक तजि ब्रज गये जलनिधि पारी,

इक ब्रजवासिन संग सदा री।

इक पूछत प्यारी ते प्यारी,

इक पूछति पिउ ते बनवारी।

इक कृपालु हैं गिरिवर धारी,

इक “कृपालु” हैं अति ही प्यारी।

राधावल्लभ कुंज बिहारी,

ब्रज युवतिन जीवन बनवारी।

राधावल्लभ कुंज बिहारी,

ब्रज रसिकन धन रासबिहारी।