जय जय निज छवि पर हरि वारी,

(ठाकुर युगल किशोर...)

जय जय निज छवि पर हरि वारी,

जय जय हँस प्यारी दै तारी।

जय जय धनि धनि सोई ब्रजनारी,

जय जय अस्तुति कर हरि गारी।

जय जय इक हरि द्वै तनुधारी,

जय जय इक प्रियतम इक प्यारी।

जय जय प्रियतम भज नित प्यारी,

जय जय प्यारिहुँ भज बनवारी।

जय जय दिय गल बहिँयन जोरी,

जय जय देहु दिठौना गोरी।

जय जय दोउ ठाकुर दोउ चाकर,

जय जय कोउ न जान गति जाकर।

जय जय श्याम गौर वर जोरी,

जय जय किंकरि करु बरजोरी।

जय जय जुग जुग जीवहु जोरी,

जय जय नवल किशोर किशोरी।

जय जय दोउ “कृपालु” मम ठाकुर,

जय जय सुन मन इनहिंन ला उर॥