सखि लखु सावन मास बहार।

(नीको लागे...)

सखि लखु सावन मास बहार।

हरियाली हरियाली आली निहार।

मंद सुगंधित बहत बयार।

उमड़ि घुमड़ि घन गरज निहार।

रिमझिम रिमझिम परत फुहार।

घन बिच दामिनि दमक निहार।

फूलेँ फूल लतन बलिहार।

झूलेँ अलि तरु झूला डार।

चलु अलि मिलि ढिंग भानुदुलार।

कहु चलिये झूलन सरकार।

कीनी ललिहिँ विनय ब्रजनार।

कीनी ललिहु विनय स्वीकार।

Source page 334

उत ते आये नंदकुमार।

सखियन किय झूला तैयार।

चंदन झूला छवि छविदार।

रेशम डोर कदंबनि डार।

झूला को किय फुलन सिँगार।

पिय कह तुम झूलहु सुकुमार।

प्यारी कह झूलहु रिझवार।

पिय चह सेवा भानुदुलार।

प्यारी चह सेवा रिझवार।

दोउन हठ लख सब ब्रजनार।

तब कह ललिता दोउ सरकार।

तुम दोउ सँग झूलहु सरकार।

दोउन झुलवति हम ब्रजनार।

झूलन बैठे दोउ सरकार।

तब झगरन लागीँ सब ब्रजनार।

हौँ ही झुलवहुँ कह ब्रजनार।

झगरो लखत युगल सरकार।

तब “कृपालु” कह सुनु ब्रजनार।

देहु मोहिँ सेवा अधिकार॥