छू मंतर करि गयो मेरो यार।

(नथवारी रंगीली...)

छू मंतर करि गयो मेरो यार।

सब लूटि लै गयो मेरो यार।

हौं तो गई रहि घट भरन यार।

तहँ आयो नंदकुमार यार।

वाने टेरी धुनि मुरलि यार।

सुनतहिं धुनि गई उर आर पार।

हौं तेहिं निहार सो मोहिं निहार।

इमि ह्वै गये औचक दृगन चार।

पुनि वाने नैनन सैन मार।

मैं भई हाल बेहाल यार।

मन कह आलिंगन चहहुँ यार।

बुधि कह लखु लख सखियन हजार।

पुनि स्नान करन गइ जल मझार।

कटि लौं जल जहँ रह यमुन धार।

बूड़ी बचाउ कोउ कह पुकार।

सोइ कूदि पर्यो सुनि मम पुकार।

Source page 250

जल भीतर वाने कियो प्यार।

पुनि पुनि आलिंगन दियो यार।

पुनि दीनो यमुना ते निकार।

बाहर ते पतिहूँ रह निहार।

पति कह हौं तेरा ऋणी यार।

तूने बचाय लइ मेरी नार।

जो कह तो कहँ दउँ पुरस्कार।

सो कह तू तो बड़ भ्रात यार।

मेरी भाभी है तेरी नार।

यह तो था मम कर्तव्य यार।

पति ने चिपटाया वाय यार।

पुनि गयो सखन सँग मेरो यार।

इत पतिहुँ गयो निज लट्ठ धार।

हौं भई विभोर तनु सुधि बिसार।

यह रोम रोम सोइ परस यार।

रोमांच कम्प तनु बार बार।

दृग बह आनँद जल बार बार।

घट भरन भयो मोहिं भार यार।

कैसेहुँ घट भर तनु सुधि सँभार।

Source page 251

घट भरि चलि घर मग मिल्यो यार।

कह अब कब कहँ मिलि करे प्यार।

हौं कह मेरो पति लट्ठ धार।

वह जाने तो तोहिं लट्ठ मार।

जब कबहूँ अवसर पाऊँ यार।

तब आप करुँ पुनि तोहिं प्यार।

कहु री “कृपालु” करु अबहिं प्यार॥