श्री वृन्दावन कुंज मझार।

(नीको लागे...)

श्री वृन्दावन कुंज मझार।

बैठीं श्री वृषभानु दुलार।

आये तहँ झूमत रिझवार।

कह कर जोरि सुनहु सुकुमार।

एक विनय है आजु हमार।

यदि आज्ञा दे दें सरकार।

निज कर चह कर तव शृंगार।

पिय इच्छा लखि भानुदुलार।

मुसकाईं लखि नंदकुमार।

मुसकनि सों जनु कह स्वीकार।

रोम रोम हर्षित रिझवार।

तेल सुगंधित सिर पर डार।

अभिमर्दन करि केश सँवार।

गुंफन करि पुनि सुमन सँवार।

लखि रिझवार जायँ बलिहार।

वेणी अति कारी घुँघरार।

Source page 179

जनु अलिगन मुख कमल निहार।

दिव्य सुगंध देह सुकुमार।

शीशफूल छवि शीश निहार।

मणिमय बिंदी इन्दु लिलार।

भृकुटि मटक लखि पिय बलिहार।

श्रुति ताटंक चपल छविदार।

लटक कपोल अलक बलिहार।

टकटकि लाग दृगन रिझवार।

नागपाश जनु पिय हित धार।

नैन नुकीले अति रतनार।

दृगन रसीले अरु अरुणार।

नैन गँसीले अरु कजरार।

कजरारे दृग काजर डार।

नासा झलमल बेसर धार।

प्यारी अधर बिंबफल वार।

दशनन दुति दामिनि दउँ वार।

चिबुक श्याम तिल श्याम निहार।

अरुणिम कंचुकि छवि छविदार।

नीलांबर झलमल बलिहार।

Source page 180

कुंदन दुलरी तिलरी धार।

रंग बिरंगे मणि गर हार।

प्यारी गर मोतिन लर धार।

गर महँ चंद्रहार रिझवार।

कर मणिमय कंकण छविदार।

पहुँची रतन जटित बलिहार।

दोउ भुज बाजूबंद निहार।

अँगुरिन मुँदरिन दुति रिझवार।

करतल मेहँदी सुघर सँवार।

कटि मणि किंकिणि धुनि झनकार।

नूपुर धुनि सुनि नंदकुमार।

दिय पिय कोटि मुरलि धुनि वार।

युगल चरण जावक अरुणार।

प्रियतम इकटक चरण निहार।

नख शिख किय सोरह शृंगार।

लखि पिय कह पुनि पुनि बलिहार।

भाल “कृपालु” दिठौना डार॥