मनिहारिनि बनि गये नंदकुमार।

(नथवारी रंगीली...)

मनिहारिनि बनि गये नंदकुमार।

मनिहारिनि छवि लखि छवि बलिहार।

लखि जुरि आईं ललितादि सखिन हजार।

मनिहारिनि मनहारिनि ब्रजनार।

मनिहारिनि किय सोरह शृंगार।

चूरिन सिर धरि गइ महलन द्वार।

पुनि पुनि कह चूरिन लेहु पुकार।

मेरी चूरी जो पहिरे नार।

वाके वश ह्वै जाय वाको यार।

स्वामिनि सों कहीं जाय ब्रजनार।

इक मनिहारिनि आई सुकुमार।

अस सुंदरि नहिं कहुँ लख्यो नार।

कोउ बड़े घरन की लगत नार।

जा ला ललिता कह भानुदुलार।

हौँ हूँ देखूँ मनिहारिनि नार।

आई मनिहारिनि ढिंग सुकुमार।

Source page 279

लख इक टक वाय वृषभानु दुलार।

पुनि पूछा नाम गाम सुकुमार।

मम नाम साँवरी सखि सरकार।

मेरो है नंदगाम सरकार।

तू ब्याही है या अहै कुमार।

हौं अब लौँ हौं कुमारि सरकार।

काहू सो किय का तूने प्यार?

मम प्रियतम तो हैं नंदकुमार।

मो सन्मुख घूँघट काहे डार।

सो कह हम लघु तुम बड़ सरकार।

ला लखूँ तोर चूरिन छविदार।

सुंदर चूरिन लखि कह सुकुमार।

ले पहिरा चूरिन कह सुकुमार।

सो पुनि पुनि कर चापति सुकुमार।

पुनि पहिरावत चूरिन सुकुमार।

टूटति पुनि पुनि चूरी मनिहार।

सो सी सी सी करि कह सुकुमार।

पहिराउ चुरी का प्रथम बार।

मनिहारिनि काँपे बार बार।

Source page 280

पुनि बिनु चूरिन कर महँ कर डार।

तब शंक भई मन महँ ब्रजनार।

पुनि मुर्छित गिरी साँवरी नार।

देखा ललिता कंचुकि कर डार।

कंचुकि में धरी मुरलि रिझवार।

ललिता कह यह तो है ठगहार।

निज गोद लियो तब भानुदुलार।

जब मुर्छा गइ देखा रिझवार।

खुलि गई सब पोल हँसी सुकुमार।

तब कंठ लगायो भानुदुलार।

तब पुनि पुनि कह “कृपालु” बलिहार॥