रस बरसाने वारी बरसाने वारी प्यारी,

(हमारी, स्वामिनि राधेरानी।)

रस बरसाने वारी बरसाने वारी प्यारी,

तोपै वारी-वारी वृषभानुदुलारी प्यारी।

प्यारी प्यारी भोरी भारी भानुदुलारी प्यारी,

मैं तो तोपै वारी वारी बरसाने वारी प्यारी।

जाको श्रुति कह आनंदघन बनवारी,

सोइ कुंज कुंज ढूँढ़े रोतो कित गई प्यारी।

जापै जग वारी, सोऊ तोपै वारी बनवारी,

तोको ढूँढ़ें कुंज कुंज कुंजबिहारी प्यारी।

तेरे रोम रोम बह दिव्य ब्रज रस प्यारी,

सोई रस पिय छकि रास बिहारी प्यारी।

कभू तो करोगी मोपै कृपा कृपामयी प्यारी,

यह है भरोसा भारी मम उर महँ प्यारी।

अगनित पतितन अपनायेहु प्यारी,

एक “कृपालुहिं” काहे बिसारी प्यारी।।

Source page 168

राधेरानी राधेरानी राधेरानी राधेरानी।

मेरी राधेरानी महरानी हूँ की महरानी,

जाकी जय हो जय हो कहि ब्रह्म करे अगवानी।

प्रेम भिखारी हरि दाता मेरी राधारानी,

जग ठाकुरहूँ ने निज ठकुरानी मानी।

महरानी राधेरानी वृन्दावन ठकुरानी,

जाको कह ठाकुर सोऊ करें अगवानी।