हरि-गुरु का ही आश्रय

प्रभु जी! भले बुरे हम तेरे।

उदर भरे पर महा आलसी, सोवत साँझ सवेरे।

काम क्रोध अरु ममता तृष्णा, रहत सदा नित घेरे।

माया-वश सब जनम गमायो, भटक फिरे बहुतेरे।

तुम बिनु कौन सहायक मेरो, बैरी बहुत घनेरे।

दास “कृपालु” आस तजि सब की, भये श्याम के चेरे॥

बलि जाउँ सलोने श्याम की।

मटकनि सिर शिखि पुच्छनि, लटकनि,

लटुरिन छवि अभिराम की।

किलकनि द्वैक दँतुलियनि-दमकनि,

घुटुवनि गवनि ललाम की।

झलकनि पीत झँगुलियनि, हलकनि,

कुंडल भल सुखधाम की।

रुनझुन करनि चरन पैजनियनि,

देखनि छुपि ब्रजवाम की।

धनि धनि अवनि “कृपालु” जननि धनि,

धनि धनि गोकुल ग्राम की॥