स्वयं को पापी मानो

मिलत नहिं नर तनु बारम्बार।

कबहुँक करि करुणा करुणाकर, दे नृदेह संसार।

उलटो टाँगि बाँधि मुख गर्भहिं, समुझायेहु जग सार।

दीन ज्ञान जब कीन प्रतिज्ञा, भजिहौं नंदकुमार।

भूलि गयो सो दशा भई पुनि, ज्यों रहि गर्भ मझार।

यह 'कृपालु' नर तनु सुरदुर्लभ, सुमिरु श्याम सरकार ।।

अहो हरि! हौं पातक अवतार।

लटकत तव तनु रोम रोम प्रति, ज्यों ब्रह्माण्ड अपार।

त्यों हमरेहुँ शत कोटि अजामिल, रह प्रति रोम मझार।

तुम तुम्हरे जन कोटि यतन करि, हारे बार हजार।

पै हौं कियो सदा मनभायो, अंध बधिर अनुहार ।

मम पातक दावानल सों अब, जरन चहत संसार।

यासों अब 'कृपालु' कछु सोचिय, याको द्रुत उपचार॥