दास का धर्म

पिय मोल अमोलक लीजिये।

अस अवसर फिर नाहिँ मिलैगो, बातन मोर पतीजिये।

बनन चहत जो अमर-सुहागिनि, तन-मन-प्रानन दीजिये।

दै सरबस लै प्रेम-सुधा-रस, तेहि रस महँ नित भीजिये।

पुनि तेहि रसहिं पिवाइय औरहिं, आपुहुँ सोइ रस पीजिये।

जनम 'कृपालु' सफल कर लीजिय, क्यों कर? निज कर मीजिये॥

नाथ! मोहिं कीजै दासन दास।

तिनको दरस परस नित पावूँ, छिन छिन को सहवास।

तन मन धन सों सदा एक रस, सेऊँ सहित हुलास।

सुनत करत सतसंग अनवरत, जग सों रहूँ उदास।

निर्भय रहूँ कृपा ते तिन की, लहूँ प्रेम सुख रास।

माँगत भीख 'कृपालु' कृपा करि, पुरवहु मम अभिलास॥