हरि-गुरु शरणागति

जयति जय, जय सद्गुरु महराज।

छके युगल रस रास सरस जनु, मूर्तिमान रसराज।

बिनु कारण करुणाकर जाकर अस स्वभाव भल भ्राज।

बरबस पतितन देत प्रेमरस, अस रसिकन सरताज।

डूबत आपु डुबावत जन कहँ, प्रेमसिंधु-ब्रजराज।

हौं 'कृपालु' गुरुचरण शरण गहि, भयो धन्य जग आज॥

नाथ! अब भटकत थकि गये पाम।

पुनि पुनि जनमि जनमि दुख पायो, नहिं पायो विश्राम।

जूते लात खात पति वनितनि, नहिं अबहूँ उपराम।

पढ़त सुनत जानत मानत पै, मन ठानत हठ बाम।

यद्यपि तव लीला गुन गावत, लेत तुम्हारोइ नाम।

तदपि 'कृपालु' कृपालु कृपा बिनु, छुटै न इंद्रिन काम॥