किशोरी जी से कृपा याचना

द्वार पतित इक आयो री किशोरी राधे !

मांगत भीख प्रेम की यद्यपि, पात्र संग नहिं लायो री किशोरी राधे !

विष्ठा-विषय हेतु नित अब लौं, शूकर ज्यों भटकायो री किशोरी राधे !

संतन कह्यो नेकु नहिं मान्यो, कियो सदा मनभायो री किशोरी राधे !

जानि जानि अपराध करत नित, नेकहुँ नाहिँ लजायो री किशोरी राधे !

नर तनु हरि हरिजन अनुकंपा, सब ही पाय गँमायो री किशोरी राधे !

तुम बिनु हेतु कृपालु ‘कृपालुहिं', पुनि काहे बिसरायो री किशोरी राधे ! .

मोहिं स्वामिनि! अब अपनाइये।

श्री बरसाने धाम आपुने, मोहूँ काहिं बसाइये।

पलक पाँवड़े पंथ बिछाऊँ, जब जाइय या आइये।

देउँ बुहारी रास मँडल महँ, रास करन जहँ जाइये।

आवन देउँ न मदन मोहनहुँ, जब मानिनि पद पाइये।

अपनिहिं दासिहिं मानि 'कृपालुहिं' बारेक मोहिं बुलाइये।।