मेरी स्वामिनी राधे

श्री राधे हमारी सरकार, फिकिर मोहिं काहे की।

हित अधम उधारन देह धरें,

बिनु कारन दीनन नेह करें,

जब ऐसी दया दरबार, फिकिर मोहिं काहे की।

टुक निज-जन क्रन्दन सुनि पावें,

तजि श्यामहुँ निज जन पहँ धावें,

जब ऐसी सरल सुकुमार, फिकिर मोहिं काहे की।

भृकुटी नित तकत ब्रह्म जाकी,

ताकी शरणाई डर काकी,

जब ऐसी हमारी रखवार, फिकिर मोहिं काहे की।

जो आरत"मम स्वामिनि!"भाखै,

तेहि पुतरिन सम आँखिन राखै,

जब ऐसी “कृपालु” रिझवार, फिकिर मोहिं काहे की॥

कुँवरि की किलकनि की बलि जाउँ।

अति द्रुत गवनि घुटुरुवनि आँगन, लखि लखि हौं ललचाउँ।

गौर बदन पर नील झँगुलियनि, झलकनि लखि मन भाउँ।

मणिन-खंभ प्रतिबिंब विलोकनि, लखि सुधि-देह भुलाउँ।

रुनझुन पग पैंजनियनि सुनि सुनि, फूलो अँग न समाउँ।

देखत बनत “कृपालु” न लेखत, किमि उपमाहिं लजाउँ॥