श्यामसुन्दर का दासत्व

हमें तो, एक तिहारी आस।

काहू के काहू को बल हरि, हमहिं तुमहिं विश्वास।

कोउ कर योग, यज्ञ दानादिक, कोउ कर जप उपवास।

कोउ कर चारिधाम तीरथ अरु, कोउ कर काशीवास।

कोउ कर आस स्वर्ग अपवर्गहिं, कोउ बैकुण्ठ विलास।

हम “कृपालु” गोपाल! तिहारिहिं, करत आस बनि दास॥

सखि कालि लखी नँदलाल रे।

गई रही कछु काम महरि घर, तहँ खेलत गोपाल रे।

सिर पर वाके मोर चंद्रिका, लट कारी घुंघराल रे।

पीत झँगुलिया झलमल झलकत, हलकत कुंडल गाल रे।

कटि किंकिनि पग पायल बाजति, चलत घुटुरुवनि चाल रे।

लखतहिं मदन गुपाल सखी मैं, भई हाल बेहाल रे।

जो “कृपालु” सब जगहिं नचावत, नाचत यशुमति ताल रे॥