श्री राधे जू की अनुपम झाँकी

हमारे मन भाईं भानुलली।

भरी गुमान दिवानी डोलति, जानत जग पगली।

लोक-वेद-कुल कानि तजी सब, लोग कहेँ विटली।

कर्म अकर्म विकर्म आदि की, विपदा आपु टली।

राधे नाम सरस-रस चाखत, अमृत मधुर डली।

विहरति नित 'कृपालु' स्वामिनि सँग, गहवर-कुंजगली॥

धरो मन, भानुलली को ध्यान।

जाको ध्यान धरत निशिवासर, सुंदर श्याम सुजान।

कनक मुकुट सिर चारु चंद्रिका, तापर लर मुक्तान।

चूनरि जरिन किनार गौर तनु, नीलांबर परिधान।

श्रुति ताटंक गुंथी वर वेणी, लजवति भौंह कमान।

नासा भल मुक्ताहल सोहति, मन मोहति मुसकान।

पग पायल गति अति अभिरामिनि, लखि मराल सकुचान।

पाय 'कृपालु' सरस अस स्वामिनि, चरन न कस लपटान॥