हरि-गुरु पर बलिहार

अस रस महँ, मोहिं सद्गुरु बोरी।

धर्म अर्थ अरु काम मोक्ष रस, सबै लगत मो फीको री।

कहँ लौं कह बैकुण्ठ-लोकहूँ, रुचि नहिं टुक सपनेहुँ मोरी।

इक भावत चंचल नँदनंदन, इक वृषभानुलली भोरी।

गिरिजा-अजा जलधिजा-दुर्लभ, पियत रास रस ब्रजखोरी।

कह 'कृपालु' अस सद्गुरु ऋण ते, उऋण न कोटि कल्प को री ॥

बलि जाउँ, युगल सरकार की।

इतै रवति सुर मधुर-मुरलिका, नागर नंदकुमार की।

उत ते आईं भानुनंदिनी, जनु मूरति शृंगार की।

कुंज कुटीर तीर कालिंदी, मिलनि दुहुँन दृग-चार की।

लखहु द्वैत-अद्वैत मधुरिमा, युगल-माधुरी-प्यार की।

यह 'कृपालु' भी चहत बूँद इक, प्रेम-पयोधि अपार की ॥