श्री राधा कृपा

सरस किशोरी, वयस कि थोरी, रति रस बोरी, कीजै कृपा की कोर।

साधन-हीन, दीन मैं राधे, तुम करुणामइ प्रेम-अगाधे,

काके द्वारे, जाय पुकारे, कौन निहारे, दीन दुखी की ओर।

करत अघन नहिं नेकु अघाऊँ, भरत उदर ज्यों शूकर धावूँ,

करि बरजोरी, लखि निज ओरी, तुम बिनु मोरी, कौन सुधारे दोर।

भलो बुरो जैसो हूँ तिहारो, तुम बिनु कोउ न हितू हमारो,

भानुदुलारी, सुधि लो हमारी, शरण तिहारी, हौं पतितन सिरमोर।

गोपी-प्रेम की भिक्षा दीजै, कैसेहुँ मोहिं अपनी करि लीजै,

तव गुन गावत, दिवस बितावत, दृग झरि लावत, ह्वैहौं प्रेम-विभोर।

पाय तिहारो प्रेम किशोरी!, छके प्रेमरस ब्रज की खोरी,

गति गजगामिनि, छवि अभिरामिनि, लखि निज स्वामिनि, बने 'कृपालु' चकोर ।।