हरि-गुरु के अनंत उपकार

गहो रे मन! श्याम चरण शरणाई।

अंत समय कोउ काम न अइहैं, मात पिता सुत भाई।

काम, क्रोध अरु लोभ, मोह, मद, इन सों कछु न बसाई।

यह जग मृग-तृष्णा सम दीखत, सुख लवलेश न पाई।

धन-यौवन-तन छन-भंगुर सब, ज्योँ कपूर उड़ि जाई।

बहुरि 'कृपालु' न नर-तनु पाइय, बिगरी लेहु बनाई॥

अहो हरि! तुम मम साहूकार।

तुम्हरे ऋणहिं उऋण नहिं होइ सक, अगनित जनम मझार।

करि करुणा करुणावरुणालय, नर तनु दिय सरकार ।

पुनि निज वेदन मार्ग बतायो, कीनो मम उपकार।

पुनि समुझायेहु संत अनंतन, लै पुनि पुनि अवतार।

कह 'कृपालु' मन तबहुँ सुन्यो नहिं, तुम ही सुनहु पुकार॥