रोम-रोम में हरि-गुरु

सुनो मन! यह अनन्य की रीत।

गौर श्याम-प्रिय परिजन तजि कहुँ, करत न सपनेहुँ प्रीत।

भुक्ति मुक्ति बैकुण्ठ आदि सों, रहत अतीत अजीत।

रसिकनि तजि श्री महाविष्णु को, करत न भूलेहुँ मीत।

विधि निषेध अरु लोक वेद की, रहत न नेकहुँ भीत।

रह प्रति रोम 'कृपालु' गौर-हरि, अरु हरिजन परतीत ॥

दयामय! अपनी ओर निहारो।

हौं तो कुटिल कुपूत सदा को, तुम निज विरद विचारो।

शिला अहिल्या, पशु वानर, गुह, श्वपच आदि उर धारो।

मम हिय कुलिश, पतितमति पशु ते, कर्म श्वपच शत वारो।

इक गुन रीझत गुनगाहक! इन, हमरे गुनन पसारो।

जो कह साधन-बल मम पद गहु, नहिं त्रिकाल निस्तारो।

हम 'कृपालु' उन प्रभु को चेरो, जो बिनु हेतु हमारो ॥