श्री राधा महिमा

लखि रस-बरसानो बरसानो, कोटिन ब्रह्मानंद लजाय।

महाभावरूपिणि श्री राधे।

प्रेम-सुधा-निधि, रूप-अगाधे।

पूरण-ब्रह्म जाहि आराधे।

श्री वृषभानुभूप घर प्रकटीं, प्रेम-दान हित आय।

जेहि, 'अज अलख' निगम नित गायो।

सो ब्रज, नंद-गोप घर जायो।

जेहि विधि, हरि हर खोजि न पायो।

सोऊ ब्रह्म, स्वामिनिहिं खोजत, गहवर गलियन माय।

पीरी-पोखर, प्रेम-सरोवर।

लता-कुंज-गहवर, भानूखर।

मालिनि, योगिनि रूप विविध धर।

ब्रह्म रिझावत, निज स्वामिनि को, उर आनँद न समाय।

'हा हा' खात, निहोरत सखियन।

नेकु दिखाउ ललिहिं इन अँखियन ।

मधु पिलावु छवि दृग मधु-मखियन।

ललितहिं चरण पलोटत लखि लखि, लाल नैन ललचाय।

राधा-रंग महल के माहीं।

रज झारत निज मुकुट सदा हीं।

कृपा मनावतहूँ डरपाहीं।

नित 'कृपालु' मानिनिहिं मनावत, ब्रह्म दृगन झरि लाय॥