बिगड़ी बना दो राधे

किशोरी मोरी, बिगरी देहु बनाय।

अति कोमल सुभाउ माँ तुम्हरो, वेद पुरानन गाय।

कासोँ कहूँ सुने को तुम बिनु? मुझ दुखिया की माय।

मोरी दशा भली तुम जानत, कबहुँ न अघन अघाय।

कपटी कुटिल कुपूत रावरो, इत उत ठोकर खाय।

भक्तिभाव कछु जानत नाहीँ, बनत रसिक-रस-राय।

अपनी ओर निहारि राधिके!, अब तो लेहु अपनाय।

मोहन सों इक बार मिला दो, परूँ तिहारे पाय।

तुम्हरो माय! कहाय पूत अब, काके द्वारे जाय।

यह 'कृपालु' हठ पुरवहु राधे!, न तु सुत मातु लजाय॥